ചോറും കറികളും ചേര്‍ന്നുള്ള വലിയൊരു ഉച്ചയൂണിന് ശേഷം ഉണ്ടാകുന്ന ഈ മയക്കത്തിന് പലരും പറയുന്ന കാരണം 'ചോറ് കഴിച്ചില്ലേ? അതുകൊണ്ടാവും' എന്നതാണ്. എന്നാല്‍ കാര്യം അത്ര ലളിതമല്ല. ചോറ് കഴിച്ചതുകൊണ്ട് മാത്രം എല്ലാവര്‍ക്കും ഉറക്കം വരണമെന്നില്ല. കഴിക്കുന്ന ചോറിന്റെ അളവ്, അതിനൊപ്പമുള്ള മറ്റ് ഭക്ഷണം, ഭക്ഷണത്തിന്റെ ആകെ ഘടന എന്നിവയ്ക്കും ഇതില്‍ പങ്കുണ്ട്.
ചോറിന് ചപ്പാത്തിയേക്കാള്‍ ഉയര്‍ന്ന ഗ്ലൈസീമിക് ഇന്‍ഡക്‌സ് ഉണ്ടായിരിക്കാം. അതിനാല്‍ ചോറ് വേഗത്തില്‍ ദഹിക്കുകയും രക്തത്തിലെ ഗ്ലൂക്കോസ് ഉയരുകയും ചെയ്യാം. ഇതിന് പിന്നാലെ ഇന്‍സുലിന്‍ പ്രതികരണവും ഉണ്ടാകും. ചിലരില്‍ ഇത്തരം മാറ്റങ്ങള്‍ ഭക്ഷണത്തിന് ശേഷമുള്ള മയക്കത്തിന് കാരണമാകാം. ചോറിന്റെ അളവ് കൂടുതലും അതിനൊപ്പം പ്രോട്ടീനും പച്ചക്കറികളും കുറഞ്ഞതുമായ ഭക്ഷണമാണ് കഴിക്കുന്നതെങ്കില്‍ ഉറക്കം കൂടുതല്‍ അനുഭവപ്പെടാം. വലിയ അളവില്‍ കാര്‍ബോഹൈഡ്രേറ്റ് മാത്രം ലഭിക്കുന്ന ഭക്ഷണത്തേക്കാള്‍ പ്രോട്ടീനും ഫൈബറും ഉള്‍പ്പെട്ട സമീകൃത ഭക്ഷണം കഴിക്കുമ്പോള്‍ ദഹനം കൂടുതല്‍ സാവധാനത്തിലാകുകയും ഭക്ഷണത്തിന് ശേഷമുള്ള ഊര്‍ജമില്ലായ്മ കുറയുകയും ചെയ്യാം.
പരിപ്പ്, പയര്‍ തുടങ്ങിയ പ്രോട്ടീന്‍ സ്രോതസ്സുകള്‍
പ്രോട്ടീനും ഫൈബറും അടങ്ങിയ ഭക്ഷണങ്ങള്‍ക്കൊപ്പം ചോറ് കഴിക്കുന്നത് ദഹനം മന്ദഗതിയിലാക്കാനും രക്തത്തിലെ ഗ്ലൂക്കോസിന്റെ വര്‍ധന കൂടുതല്‍ നിയന്ത്രിതമാക്കാനും സഹായിക്കും.
വലിയ അളവില്‍ ചോറ് കഴിക്കുകയും അതിനൊപ്പം പ്രോട്ടീനും പച്ചക്കറികളും കുറവായിരിക്കുകയും ചെയ്താല്‍ ഭക്ഷണത്തിന് ശേഷമുള്ള മയക്കം കൂടുതല്‍ ശക്തമായി അനുഭവപ്പെടാം. അതുകൊണ്ട് കഴിക്കുമ്പോള്‍ ചോറിന്റെ അളവിനൊപ്പം കൂടെ എന്തൊക്കെ കഴിക്കുന്നു എന്നതും പ്രധാനമാണ്.
ചോറിന് പകരം ചപ്പാത്തി കഴിച്ചാല്‍ ഉറക്കം ഒരിക്കലും വരില്ല എന്നില്ല. എന്നാല്‍ മുഴുവന്‍ ഗോതമ്പ് ചപ്പാത്തിക്ക് സാധാരണയായി വെള്ളച്ചോറിനേക്കാള്‍ കുറഞ്ഞ ഗ്ലൈസീമിക് ഇന്‍ഡക്‌സ് ഉണ്ടായിരിക്കുകയും ഫൈബര്‍ കൂടുതലായിരിക്കുകയും ചെയ്യാം. അതിനാല്‍ രക്തത്തിലെ ഗ്ലൂക്കോസ് ഉയരുന്നത് താരതമ്യേന സാവധാനത്തിലാകാം.
ഭക്ഷണത്തിന് ശേഷം ചെറിയൊരു മയക്കം പലര്‍ക്കും സാധാരണമാണ്. ഇതിനെ post meal sleepiness അല്ലെങ്കില്‍ postprandial somnolence എന്ന് വിളിക്കുന്നു. വലിയ അളവിലുള്ള ഭക്ഷണം, കാര്‍ബോഹൈഡ്രേറ്റ് കൂടുതലുള്ള ഭക്ഷണം, രക്തത്തിലെ പഞ്ചസാരയിലെ മാറ്റങ്ങള്‍, ഉച്ചയ്ക്ക് ശരീരത്തില്‍ സ്വാഭാവികമായി ഉണ്ടാകുന്ന alertness കുറവ് തുടങ്ങിയ പല ഘടകങ്ങളും ഇതിന് കാരണമാകാം.
ചോറിന്റെ അളവ് കുറയ്ക്കുക: വലിയ പ്ലേറ്റ് നിറയെ ചോറിന് പകരം നിയന്ത്രിത അളവില്‍ കഴിക്കുക.
പ്രോട്ടീന്‍ കൂട്ടുക: പരിപ്പ്, മുട്ട, മീന്‍, തൈര് തുടങ്ങിയവ ഭക്ഷണത്തില്‍ ഉള്‍പ്പെടുത്താം.
പച്ചക്കറിയുടെ അളവ് കൂട്ടുക: ഫൈബര്‍ ലഭിക്കാന്‍ പച്ചക്കറികള്‍ കൂടുതല്‍ ഉള്‍പ്പെടുത്തുക.
വേഗത്തില്‍ കഴിക്കരുത്: ഭക്ഷണം പതുക്കെ കഴിക്കുന്നതാണ് ഗുണപ്രദം
ഭക്ഷണത്തിന് ശേഷം ചെറിയ നടത്തം: സാധിക്കുന്നെങ്കില്‍ കുറച്ച് നേരം നടക്കുന്നത് ഭക്ഷണത്തിന് ശേഷമുള്ള ക്ഷീണം കുറയ്ക്കാന്‍ സഹായിക്കാം.
Content Highlights :Eating rice does not necessarily make everyone feel sleepy; the quantity of rice consumed, the accompanying foods, and the overall composition of the meal also play a role.